NOTA

డబ్బు గెలుస్తుందా…?లేక అధికారం గెలుస్తుందా….? ఇప్పుడు  ఎన్నికలలో ఆసక్తిగా మారిన విషయం.ఈ ఎన్నికల వలన మన రాష్ట్రానికి మన రాష్ట్ర ప్రజలకు ఒరిగేదేమీ లేకపోయినా, ఆదిపత్య పోరుకు సిద్దమయింది.ఇవి ఎన్నికలు అనడం కన్నా డబ్బు కి అధికారానికి మధ్య ఆదిపత్య పోరు అనడం సబబేమో.మామూలుగా రాష్ట్రం లో ఎన్నికలంటే అల్ప సంతోషి అయిన ఓటరు యాబయ్యో వందో వస్తాయని చంకలు గుద్దుకుంటాడు కాని, ఆ ఓటు విలువ వందల నుండి వేలల్లోకి దాటిపోయింది.

ఎక్కడో తమిళనాడు లోని ఎన్నికలు చూసి విరక్తి కలిగింది,ప్రజాస్వామ్యం నాశనం అయిందే అనే చిన్న బాధ కలిగింది.ఇంటికో mixi,fan,TV ఇలా నోటికి అందినన్ని ఫ్రీ బహుమతులను ఇస్తామంటే అవాక్కవడం మన వంతు అయింది.  కానీ ఇప్పుడు యువతను, ముసలి వారిని కూర్చోబెట్టి ఫ్రీ గా పెన్షన్ ఇస్తాము, చేతగాని దద్దమ్మల్లా చేస్తాము అని డైరెక్ట్ గా వాగ్ధానాలు ఇస్తున్న మన నాయకుల లో ప్రజా సేవ కంటే అధికార దాహం,ఆధిపత్యం కోసం పడే తపన ఎంతగా పెరిగాయో అర్ధం చేసుకోవచ్చు.

ఇలాంటి ప్రమాదకర పోటి మద్యలో ఒక మంచి చేద్దామనుకునే నాయకులు ఎవరన్నా నిలబడగలరా…? ఒకవేళ నిలబడ్డా గాని బ్రతికి బయటపడనిస్తారా..?  వీళ్ళని ఇలా తయారు చేసింది మనం మన ప్రజాస్వామ్య వ్యవస్థ. ఎన్నికల అఫ్ఫిడవిట్ లో కనీసం సొంత కారు,బ్యాంకు బాలన్స్ లేదు అని చూపిచ్చుకునే మన నాయకులకు ఎన్నికలలో మాత్రం పంచడానికి కోట్లు ఎక్కడనుండి వస్తున్నాయో మన ఎన్నికల కమీషన్ కి తెలియకపోవడం వింతే మరి.

ఇంత బహిర్గతంగా అక్రమాలు జరుగుతుంటే మన చట్టాలు కాని,మన ఎన్నికల అధికారులు కాని ఏమి చేస్తున్నట్లు..!నిదురపోతున్నాయా...? అంత పెద్ద వ్యవస్తే  ఏమి చేయకుండా చూస్తూ ఉంటె ఇక సామాన్యుడు ఏమి చేస్తాంలే అని తప్పక తమ ఓటు ని ఏదో ఒక దుర్మార్గుడికి వేయాల్సిన తప్పని పరిస్థితి వస్తుంది(మరి అస్సలు ఓటు వేయకపోతే అదొక నేరం కదా).

అందుకే ధైర్యం గా ఏమి చేయలేని ఈ సామాన్యుడికి ఒక అవకాశం వచ్చింది, మీ ఓటు ఏ అబ్యర్ది కి వేయడం ఇష్టం లేదని తెలియచేయడానికి ఒక గుర్తుని కేటాయించారు ఈ ఎలక్షన్ లో అదే NOTA. ఏ నాయకుడు సరి అయిన వాడు కాకపొతే తమ ఓటు ఎవరికి వేయట్లేదని తెలియచేసే ఈ అవకాశం ఓటరుకి కల్పించారు.  NOTA ఓట్లు ఎక్కువ వస్తే అక్కడ ఎన్నికలని రద్దు చేసి అక్కడ పోటి చేసిన అభ్యర్దులను అనర్హులగా ప్రకటించే అవకాశం ఉంది.ఇలాంటి అవకాశం వలన ప్రజలు గోప్యంగా అయినా ఈ అన్యాయాన్ని ఈ అక్రమార్కులను వ్యతిరేకించే అవకాశం వస్తుందని నా అభిప్రాయం. 

ఈ సారి ఎలక్షన్ లో మీ విలువయిన ఓట్ ని వృథా  చేయకండి అని ఆసిస్తూ ……………సతీష్ ధనేకుల .

నేటి సమాజం..!!

పక్కన మనిషికి పిసరంత గౌరవం కూడా ఇవ్వము, జాతీయ గీతాన్ని గౌరవించడం దేశ భక్తి అని చాటుతాము.. 
ఆకలితో కనపడిన వాడికి పట్టెడన్నం పెట్టము, కనపడని రైతు మీద ముసలి కన్నీరు చూపిస్తాము.. 
రాజకీయాలకు నీతులు చెప్తాము, మనకి నచ్చిన నాయకుడు ఏ తప్పు చేసినా భుజాలమీద వేసుకుని భజన చేస్తాము.. 
మన వాడికి తప్పు జరిగితే నే అన్యాయం అని పోరాడతాము, పరాయి వాడికి జరిగితే అదే న్యాయం అని గొంతెత్తి అరుస్తాము.. 
దేశం బయట మన ప్రాణాలను కాపాడే జవానులను ప్రేమిస్తాము, 
వారు కాపాడిన ఆ ప్రాణాన్నే మన అవసరాల కోసం చంపేస్తాము.. 
ఎదుట గా ఉన్న సమస్యను మనకెందుకులే అని వదిలేస్తాము, 
TV ల లో సమస్యలకు ముసుగేసుకుని పోరాడతాము.. 
అప్పట్లో తెల్ల వాడి చేతిలో విభజించి పాలించబడ్డాము, 
ఇప్పటికీ మన పాలనలో ఎవడికి వాడు కులం మతం అని మనకి మనమే విభజించుకుని పోరాటం చేస్తున్నాము...!! 

మీ...... ***సతీష్ ధనేకుల***

ప్రేమకు ప్రాణం తీసే హక్కు లేదు

మన రాజ్యాంగం లో మైనర్, మేజర్ అనే చట్టాలను తీసేయాల్సిన రోజు వచ్చినట్లుంది. ఎందుకంటే మనం చెప్పిన మాట వింటే బ్రతకనిస్తాం లేకపోతే చంపేస్తాం అనే మూర్ఖత్వం ఉన్న చోట మేజర్ అనే పదానికి అర్ధం లేదు. అరే ఒక ప్రాణం అన్యాయం గా తీసేసారు అనే బాధను పక్కకు నెట్టేసి, 9th క్లాస్ లో కొవ్వు పట్టి ప్రేమించుకున్నారు వాళ్లకు తగిన శాస్తి జరిగింది అనే ప్రతి మూర్కులారా..! మీరనుకునే కొవ్వు పట్టిన వారిలా తిరిగి ఎవరి దారి వాళ్ళు చూసుకోలేదు, మీరు నమ్మని మేజర్ అనే వయసు వచ్చిన తరువాత వారిద్దరి ఇష్టం తో పెళ్లి చేసుకుని వారి జీవితం వారు గడుపుతున్నారు(ఇక్కడ తల్లి తండ్రుల ఇష్టం అవసరం లేదా అని అడగొచ్చు, నీ ఇష్టాన్ని అవతలి వారి మీద కష్టం గా రుద్దే హక్కు ఈ సమాజం లో ఎవరికీ లేదు). ఎంతో మంది మేధావులు మన రాజ్యాంగాన్ని చట్టాలను పెట్టింది అందుకే అస్సలు మేజర్ అనే చట్టం పెట్టిందే ఒక వయసు దాటిన తరువాత ఎవరి జీవితం మీద వారికి హక్కు రావాలి అని. వారు తీసుకునే నిర్ణయం తప్పు, ఒప్పు  అన్నది పక్కన పెడితే అది వారి జీవితం. అస్సలు వాళ్ళు తప్పు చేశారా ఒప్పు చేశారా అని నిర్ణయించడానికి మనమెవరం?? ఇలాంటి వాళ్ళని బ్రతకానిస్తే ప్రతి తల్లి తండ్రి బాధపడాలి వాళ్లకి బ్రతికే హక్కు లేదు అనే ఆటవిక సంస్కృతి లో కి వెళ్తున్న మనమా వాళ్ళను ప్రశ్నిస్తుంది?? ఇక్కడ తల్లి తండ్రుల ప్రేమ అయినా భార్య భర్తల ప్రేమ అయినా ఒక్కటే,  ఏ నిజమయిన ప్రేమ అయినా తన బిడ్డ సుఖం గా ఉండాలి అని కోరుకుంటుంది కానీ తనకి నచ్చిన వాళ్ళతో ఉండాలి అనుకోదు.  మీరు అనుకునే సుఖం డబ్బు తో, కులం తో లేక మతం తో వస్తుంది అనుకుంటే దానికి ప్రేమ అనే పేరు వాడకండి. ఏ ప్రేమకు ఇంకో ప్రాణం తీసే హక్కు లేదు అది తప్పు అయినా ఒప్పు అయినా..  మీ మూర్ఖమయిన వాదనను సమర్ధించుకోవడానికి ఈ రోజు దేశ సైనికులో లేక రైతులు మీకు గుర్తొస్తున్నారు. వీళ్ళందరూ ఎటువంటి స్వార్థం లేని వాళ్ళు వీళ్ళని ప్రాణాలు తీసే మృగాలతో  పోల్చి మీరే వాళ్ళ పరువు తీస్తున్నారు.  ప్రేమ అంటే ప్రేమించడమే కానీ, ప్రాణం తీయడం కాదని అర్ధం చేసుకుంటారని ఆశిస్తూ ........     మీ సతీష్ ధనేకుల 

వ్యక్తి పూజ..!

మన దేశం ఎంత వెనకపడుతుందో అని తెలుసుకోవడానికి ఏ జిడిపి వాల్యూ నో లేక, మన రూపాయి విలువ తెలుసుకోవాల్సిన అవసరం అస్సలు లేదు.  ఒక్కసారి మన సోషల్ నెట్వర్క్ లోకి వెళ్లి చూడండి. 

"ఒక ప్రాణం పోయిన చోట మానవత్వం కన్నా, క్రిస్టియన్ vs హిందూ  గొడవ కనపడుతుంది"
"ఒక శీలం పోయిన చోట ఓదార్పు కన్నా, హిందూ  vs ముస్లిం హింస కనపడుతుంది"
"పెట్రోల్ ధరలు పెరిగిన చోట సామాన్యుడి బాధ కంటే, కాంగ్రెస్ vs బీజేపీ అభిమానుల రభస కనపడుతుంది"
"ఒక స్కాం జరిగింది అంటే దాని మీద విచారణ కన్నా, మీ హయాం vs మా హయాం అనే డిబేట్ కనపడుతుంది"
 
ఇప్పుడు ఏ వ్యక్తినో ఏ పార్టీ నో ప్రశ్నించాలి అంటే ఉండాల్సింది నిజాయితీ కాదు, ఆ వ్యక్తి సోషల్ నెట్వర్క్ ఫాల్లోవెర్స్ ని తట్టుకునే ధైర్యం మాత్రమే..! 

ఏ పొలిటీషియన్ తప్పు చేసినా ఒకప్పటి  లా తాను సమాధానం చెప్పాలి అని భయపడాల్సిన పని అస్సలు లేదు, ఎందుకంటే ఇప్పుడు వారి వ్యక్తి పూజలు చేసే అభిమానులే అవన్నీ చూసుకుంటున్నారు..!

ఒకప్పుడు ప్రజలు ఎక్కడ తమని ప్రశ్నిస్తారా అని రాజకీయ నాయకులలో కాస్త భయం ఉండేది, ఇప్పుడు ఆ ప్రజలే అభిమానులం అనుకుంటూ  వారికి వారే రోజూ సోషల్ నెట్వర్క్ లో కొట్టుకుంటున్నారు..!
 
రాజకీయ నాయకుల లారా మీకెటువంటి భయం ఇక లేదు, దేశానికి ఆర్మీ సరిగా న్యాయం చేస్తుందో లేదో కానీ మీ వ్యక్తి పూజలు చేయటానికి సోషల్ నెట్వర్క్ లో రోజుకొక ఆర్మీ పుట్టుకొస్తూనే ఉంది...!!

మీ........***సతీష్ ధనేకుల***


 
 
 
 

పరువు కోసం ప్రాణం తీసేది కులం...!

ఆకలి లో పట్టెడన్నం పెట్టదు కులం.. 
ఆపదలో ఏ సాయం కానిది కులం.. 
అవసరానికి ఆసరా రానిది కులం.. 
కానీ,,,
పేరు వెనక తోకలా కులం..  
ఊరు చివర పాక లా కులం..
పరువు కోసం ప్రాణం తీసేది కులం...!

కులం అనే ఒక చిన్న పదం ప్రణయ్ అనే జీవితాన్ని ముగించింది,
అమృత అనే అమ్మాయి జీవితం లో విషాన్ని చిందించింది,
తన పరువే తాను తీసుకోవడానికి కులం పరువు పేరు చెప్పి ఇద్దరి జీవితాలను నాశనం చేసింది. 

ఇంకా ఇలాంటి వారు ఉన్నారా ఇంకా సమాజం మారలేదా అనుకుంటున్న వాళ్లకి ఇదొక్కటే ఉదాహరణ కాదు..!
ఈ హత్య ను కూడా సమర్థిస్తున్న వారు,
ఈ హత్య ను మతాల వారి గా వాడుకుంటున్న వారు,
ఈ హత్య ను ఒక మృగం ఒక మానవుడి కి చేసిన అన్యాయం గా చూడకుండా,
ఒకే కులం ఒకే మతం తో చూస్తూ  మూగపోతున్న మిగిలిన మనమందరం మారే వరకు సమాజం మారదు...!!
 
  మీ.......  ***సతీష్ ధనేకుల***

మానవ వైపరీత్యం

ప్రకృతి వైపరీత్యాల కన్నా మానవ వైపరీత్యాలే భయానకంగా మారాయి..!
ఒక రాష్ట్రం వరదలతో అతలాకుతలం అవుతుంటే, వారు మన మతం, జాతి కాదు అని చంకలు గుద్దుకుంటున్నాం.. 
మనం రూపాయి సాయం చేయం కానీ అవతలి వాడు అంతే ఇచ్చాడు వీడు ఇంతే ఇచ్చాడు అని అపహాస్యం చేస్తున్నాం.. 
మనకి నచ్చిన వాడు విరాళం ఇస్తే పదిరెట్లు ఎక్కువ చెప్పుకుంటున్నాం.. 
అదే నచ్చని వాడు చేస్తే ఏ స్వార్థం తో చేసాడో అని పేర్లు పెడుతున్నాం.. 
ప్రకృతి ప్రళయాలకు బాధ పడుతున్నామా.. లేక మన నీచ మానవ బుద్ధి ని బయటపెడుతున్నామా..!

కుదిరితే ఒక చేత్తో సాయం చేయి, కుదరకపోతే మౌనం గా ప్రార్ధన చేయి అంతే కానీ ప్రతీది రాజకీయం మాత్రం చేయకు...!! 

మాన(దై )వత్వం

నువ్వు అనుసరించని  రాముడు మంచోడు అయితే నీకెందుకు  చెడ్డోడు అయితే నీకెందుకు మహేషా...!
కనపడని దేవుడిని అంటే నీకొచ్చిన కోపం లో ఓ  సగ  భాగం సామాజిక వివక్షతల మీద కూడా చూపించవయ్యా  ఓ మనిషీ...!! 
వివేకానందుడి వ్యక్తిత్వం తెలీని వాడు కూడా వివేకానంద యూత్ అని చెప్పుకుంటాడు, చేగువేరా తెగువ తెలీనోడు కూడా బైక్ ల మీద బట్టల మీద బొమ్మలేసుకొని తిరుగుతాడు..!!
వ్యక్తిత్వాలను గౌరవించకుండా వ్యక్తులను పూజించే వ్యవస్థ లో మార్పుని ఆశించొద్దు..!!! 

***సతీష్ ధనేకుల***

రాజకీయ అత్యాచారం

 

అభిమాని!!

హీరో ల, రాజకీయ పార్టీ ల మరియు కుల అభిమానులకు సూటి ప్రశ్న..!

ఒక వ్యక్తిని కాని, వ్యవస్థని కానీ తనలో ఉన్న లోపాన్ని వేలెత్తి చూపి సరిదిద్దుకునేలా చెప్పే వాడే అభిమాని. భజన చేసే వాడెవడు అభిమాని కాడు. 

ఇక్కడ నేను ముగ్గురు అభిమానుల గురించి చెప్పదలచుకున్నాను. 
తెలుగు తమ్ముళ్లు 
వైయస్ఆర్ కుటుంబం
జనసేన సైనికులు

     ఇందులో ఏ అభిమాన సంఘానికయినా ఎదుటి వాడి లోపాన్ని వేలెత్తి చూపడమే తప్ప తను అభిమానించే వారి తప్పులను వేలెత్తి చూపించే నిబద్దత ఉందా...! అలా చూపించిన సందర్భం ఎప్పుడన్నా ఉందా..!!

మనిషి అనే వాడెవడు ఎల్లప్పుడూ  కరెక్ట్ కాదు, తన నిర్ణయాలు కానీ తన చర్యలు కానీ అన్ని వేళలా సరికావు. ఏనాడన్నా ఈ అభిమాన సంఘాలు తమ వాళ్ళ గొప్పలు చెప్పడమే కానీ వాళ్ళ తప్పులను అంగీకరించగలిగారా..!  పొరపాటున ఏకవచనం తో సంబోదించినందుకు సభాముఖం గా క్షమాపణ చెప్పిన పుచ్చలపల్లి సుందరయ్య గారి లాంటి సంస్కారం నుండి ఎదుటి వాడి భార్యా పిల్లలను కూడా తిట్టుకునే కుసంస్కారాన్ని ప్రోత్సాహిస్తుంది ఎవరు...! వ్యక్తి తీసుకునే నిర్ణయాలను అంగీకరించాలి లేదా విభేదించాలి కానీ, ఆ వ్యక్తి నే ఆరాధించడం అభిమానం కాదు ధ్వాంతము. 


***సతీష్ ధనేకుల***
 
 

పగటి కలలు

మార్కెట్ లోకి ఇంకో కొత్త చంద్రబాబు, జగన్ లాంటి నాయకుడే వస్తున్నాడేమో అనే భయాన్ని నాకు పవన్ కళ్యాణ్ కల్పిస్తున్నాడు. రాజకీయాలలోకి కొత్త రక్తం రావాలి జనాలలో చైతన్యం తేవాలి నిస్స్వార్ధమయిన నాయకులు రావాలి అని పగటి కళలు కనే ఎంతో మంది సామాన్యులలో నేను ఒకడిని. మళ్ళీ మన కలలు పగటి కల గానే మిగిలిపోతుంది  అని నాకు అనిపిస్తున్న కారణాలు..!

మన రాజకీయాలలో ఏనాటి నుండో ఫాలో అవుతున్న మొదటి సూత్రం, "మనం చేస్తే సంసారం, అదే ఎదుటి వాడు చేస్తే వ్యభిచారం". 

మొదట టీడీపీ విషయానికి వస్తే ఎలక్షన్ అవసరాలప్పుడు నరేంద్ర మోడీ ఒక గొప్ప హీరో ఈ దేశాన్ని ఉద్దరించడానికి వచ్చిన నిస్స్వార్ధమైన నాయకుడు. పవన్ కళ్యాణ్ ఒక గొప్ప త్యాగశీలి నిజాయితీకి మారు పేరు. కానీ మన అవసరాలు మారిన తరువాత, ఇప్పుడు మోడీ దేశ ద్రోహి పవన్ కళ్యాణ్ పర్సనల్ గా చెడ్డోడు అయిపోయాడు వీళ్ళకి... 

ఇక వైసీపీ విషయానికి వస్తే, ఎలక్షన్స్ ముందు బీజేపీ టీడీపీ పార్టీలు మతపూరిత పార్టీలు వీళ్లిద్దరు కలిసి దేశాన్ని దోచుకుంటారు, పవన్ కళ్యాణ్ చేతకాని వాడు ప్యాకేజీ లకు అమ్ముడు పోయాడు. కానీ ఇప్పుడు మన అవసరాల కోసం మోడీ మంచోడు అండ్ మోడీ ని డైరెక్ట్ గా పొగడకపోయినా ఎప్పుడు నోరెత్తి ప్రశ్నించము. ఇప్పుడు పవన్ కళ్యాణ్ మంచోడు పవన్ కళ్యాణ్ ని ఎమన్నా అంటే మేమున్నాం అంటున్నారు.. 

ఇక పవన్ కళ్యాణ్ విషయానికి వస్తే, ఆవేశం తో విప్లవ ఉద్యమాలను నడపొచ్చేమో కానీ రాజకీయ పార్టీలను నడపలేము అని నా ఉద్దేశం. మన ఆలోచన మంచిదే అవ్వొచ్చు కానీ ఆవేశం లో తీసుకునే ఏ నిర్ణయం మంచిది కాదు అని మన పెద్ద వాళ్ళు ఊరికే చెప్పలేదు. గొప్ప నాయకుడికి ఉండాల్సిన మొదటి లక్షణం సహనం, "తన కోపమే తన శత్రువు" అన్నట్లు కోపం తో ఆవేశపడి తీసుకునే ప్రతి నిర్ణయం తన భవిషత్తుకి ఆటంకం గానే మిగిలిపోతుంది. అదే పవన్ కళ్యాణ్ ఒక వ్యక్తి అయితే ఆవేశపడి తన మీదకు వచ్చిన వాళ్ళని ఎదుర్కోవడం లో ఏ తప్పు లేదు. కానీ తాను వ్యక్తి స్థాయి నుండి ఎప్పుడో ఒక శక్తి స్థాయి కి వచ్చాడు, అలాంటి వాళ్ళు ఏదయినా సమస్య వచ్చినప్పుడు తన సొంత సమస్యలా పోరాడకూడదు. తనతో పాటు మిగిలిన ప్రతి సామాన్యుడు రోజు ఫేస్ చేస్తున్న ప్రోబ్లం లా పోరాడాలి. 

కొన్ని చానెల్స్ చంద్రబాబు భజన చేస్తూ, మరికొన్ని చానెల్స్ జగన్ ఓదార్పు యాత్రలనే చూపిస్తూ రైతుల సమస్యలు సామాన్యుడి కష్టాలను పట్టించుకోవట్లే కానీ ఏ నాడు దీని మీద గట్టిగా అడిగిన రోజు లేదు. ఈ రోజు మిమ్మల్ని పర్సనల్ గా దూషించారు మిమ్మల్ని టార్గెట్ చేశారు అని బాధ వ్యక్తం చేస్తున్నారు. కానీ ప్రతి రోజు ప్రతి ఛానల్ ప్రతి సామాన్యుడికి చేస్తుంది ఇదే సర్. మిమ్మల్ని మీ అమ్మ గారిని ఎవరో దూషించారు అని అంటున్నారు, ఒక పోలీస్ స్టేషన్ లోనో  లేక  రాజకీయ నాయకుడు దగ్గరో ఒక సామాన్యుడిని వాడి అమ్మని, చెల్లిని ప్రతి రోజు పిలిపించుకునే ఊతపదమే ఇది సర్. ఈ రాష్ట్రాన్నే తన కుటుంబముగా భావించే నాయకుడు అవ్వాల్సిన మీరు నా కుటుంబాన్ని నా అమ్మని ఏదో అంటున్నారు అని బాధపడే రాజకీయ నాయకుడు అవుతారని ఏ రోజు అనుకోలేదు నేను. ఏదన్నా సమస్య వచ్చినప్పుడు అధికారపక్షాన్ని అడిగితే ప్రతిపక్షం వాళ్ళని దూషించినట్లు, ప్రతి పక్షం వాళ్ళు అధికార పక్షాన్ని దూషించినట్లు. కాస్టింగ్ కౌచ్ సమస్యను మీరు కూడా వదిలేసి మీ ఫామిలీ సమస్యగా తీసుకుంటున్న తీరు చూస్తే మళ్ళీ నాకు పగటి కలలు కంటున్నట్లే ఉంది సర్...!

ఎప్పటికయినా నా పగటి కలలు కలలుగా మిగలకుండా ఒక గొప్ప నాయకుల గా మారుతాయి అని ఆసిస్తూ.....సతీష్ ధనేకుల !!!

దీక్షలు ఓదార్పులు ఆవేశాలు ఇవే రాజకీయాల

ప్రత్యేక హోదా చట్టం చేసి చుట్టం చూపు కూడా చూడని కేంద్రం మీద న్యాయ పోరాటం చేయకుండా ముహూర్తాలు పెట్టుకొని దీక్షలు చేసే అధికారపక్షం... 

అధికార పక్షం మొత్తం అన్యాయమే అంటూ  ఒక్క కేసు పెట్టకుండా ఓదారుస్తూ ఊర్లు పట్టుకుని తిరుగుతున్న ప్రతిపక్షం... 

 ఆడపిల్లలకు అన్యాయం జరిగితే పోలీసు స్టేషన్ మెట్లు ఎక్కాలి కానీ తన దాకా వస్తే ఆవేశం తో ఫిలింఛాంబర్ రోడ్లు ఎక్కే అజ్ఞాతవాసం... 

ఈ దీక్షలకి, ఓదార్పులకి, ఆవేశాలకి ఎప్పటిలాగే బకరాలమయ్యే అమాయకపు జనం...!


***సతీష్ ధనేకుల***

మనిషి అనే ముసుగులో ఉన్న క్రూర మృఘాలం

మనుషులమా మనం మనుషులమా మనం,

కాదు మర మనుషులం మనం,

కాదు కాదు క్రూర మృగాలం మనం.. 

నా అనుకుంటే మనం ఏదయినా చేస్తాం,

కాదు అనుకుంటే మనం పురుగుల్లా చూస్తాం.. 

కనపడని దేవునికయి ప్రాణాలయినా ఇస్తాం,

కల్పించిన మతం కోసం పసి ప్రాణాలయినా తీస్తాం.. 

ఆ పసి ప్రాణాల మీద శవ రాజకీయాలనూ చేస్తాం. 

మొన్న ఢిల్లీ సమస్యను ఉపయోగించుకుని ఒకడు సీఎం అయ్యాడు,

నేడు కాశ్మిర్ సమస్యతో ఇంకొకడు పీఎం అవుతాడేమో,

కానీ మారాల్సింది సీఎం, పీఎం లు కాదు ఇంకా కులాలు మతాలు అంటూ మనుషులం అనే ముసుగులో తిరుగుతున్న క్రూర మృగాలమైన మనం...!

 

గుమ్మడి కాయల దొంగ

మొన్నటి వరకు ప్రశ్నించలేదని తిట్టారు.. 
నిన్న జగన్ ని ప్రశ్నించాడని YSRCP వాళ్ళు తిట్టారు.. 
నేడు బాబు ని ప్రశ్నించాడని TDP వాళ్ళు తిడుతున్నారు.. 
అంటే, మనకు ప్రశ్నించడం నచ్చదా.. లేక మనల్ని ప్రశించడం మాత్రమే నచ్చదా...!
ఎదుటి వాడిని తిడితే మనం భుజాలు ఎగురవేస్తాం,
మనల్ని తిడితే వాడు భుజాలు ఎగురవేస్తాడు. 
ఇలా గుమ్మడి కాయల దొంగ అనగానే తడుముకునే అన్ని రోజులూ ,
ఎపుడో అపుడు ఎవడో ఒకడి ప్రశ్నకి సమాధానం ఇవ్వక తప్పదు...!!

చట్టాలు vs విలువలు

స్వేచ్ఛ అనే హక్కు మనం పొంది 69 సంవత్సరాలు దాటింది,
అంటే 90 సంవత్సరాలు దాటిన మా తాత 21 సంవత్సరాలు స్వేచ్ఛ లేకుండానే గడిపాడా..!
కానీ, ఏ నాడు తన స్వేచ్ఛకు భంగం కలిగిందని చెప్పినట్లు నాకు గుర్తు లేదు. 
రాజ్యాంగపు చట్టాలు లేని రోజుల్లో మనుషుల మధ్య విలువలు ఉండేవి,
ఇప్పుడు ఆ విలువలను కాపాడుటకు చట్టాలు మాత్రమే ఉన్నాయి. 
విలువలను కాపాడుటకు వ్యక్తులు మారకుండా.. 
వ్యక్తులను కాపాడుటకు చట్టాలు మారుస్తూ  గడిపేస్తున్నాము...!

***హ్యాపీ రిపబ్లిక్ డే** 

మీ........సతీష్ ధనేకుల!!!

తప్పులెంచు వాడు తమ తప్పులెరుగడు...!

నేటి సమాజం లో తప్పు ఒప్పు అంటూ ఏమి లేదు..!
నీకు నచ్చితే ఒప్పు,
నీకు నచ్చకపోతే తప్పు. 
అది కత్తి మహేష్ అయినా,
ధనేకుల సతీష్ అయినా, నువ్వు అయినా, ఇంకెవడయినా...!

ఒకప్పుడు సమాజం నీకు ఏమి చేసింది  అని కాదు,
నువ్వు సమాజానికి ఏమి చేశావు అని ఆలోచించమనేవారు.. 
ఇప్పుడు ఎదుటి వాడు సమాజానికి ఏమి చేస్తున్నాడు అని ప్రశ్నించే ముందు నువ్వు సమాజానికి ఏమి చేస్తున్నావు అని ఆలోచించే వారు ఎవరు...!

మన మీడియా వాళ్లకి సమాజం లో ఏ ఒక్క చిన్న సమస్య కనిపించదు కానీ,
వ్యక్తుల మద్య సమస్యలు మాత్రం పెద్దవి గా కనిపిస్తున్నాయి..
ఎందుకంటే...! వీళ్ళ TRP సమస్యలు తీర్చేది ఆ వ్యక్తులే కదా...!!


మీ........సతీష్ ధనేకుల !!

సంక్రాంతి శుభాకాంక్షలు

చిన్నప్పుడు సంక్రాంతి అంటే!!

మారిన అరిగిన చెప్పుల జోడు.. 
పాత పొట్టి నిక్కరుకు మరో కొత్త ప్యాంటు తోడు.. 
వేచి వేచి ఎదురు చూసిన సెలవు రోజులు ఏడు.. 
మళ్ళీ మిత్రులందరూ  ఒకటిగా చేరిన తోడు..
బుడి బుడి అడుగులకు భోగి పళ్ళు గుప్పెడు..
సంక్రాంతి కి ఇంటి ముందర నాట్యం చేసే ముగ్గుల చప్పుడు..
కనుమ రోజు కంచం కంగుమనేటప్పుడు..
పండుగ అంటే తెలీదప్పుడు,
తెలుస్తుంది దాని విలువ తిరిగి బడి గంట మోగినప్పుడు.. 

అప్పుడు ఇప్పుడు ఎప్పుడూ  పండుగ అంటే అందరం కలిసి ఉన్నప్పుడు !!

            ***అందరికి సంక్రాంతి శుభాకాంక్షలు***

మీ.......సతీష్ ధనేకుల!!

మారాల్సింది క్యాలెండర్ లో డేట్ కాదు...!

మనలో మనిషిని కరిగిస్తూ
'మర' లా మారుస్తూ 
ఆ మార్పును గర్వం తో ఆస్వాదిస్తూ 
అదే గొప్ప అని భావిస్తూ 
ఎదుటి మనిషిని హీనం గా చూస్తూ 
మన అవసరాలకయి విలువిస్తూ 
మనకి నచ్చితే నానుస్తూ 
లేకుంటే ద్వేషిస్తూ 
తనలో మంచిని మరుస్తూ 
చెడునే వేలెత్తి చూపిస్తూ  
దగ్గరిని దూరం చేస్తూ 
లేనివి ఊహిస్తూ 
అందరికి అందనంత ఎత్తులో ఉన్నా అని భావిస్తూ 
నీకయి తెలీక నీకు నువ్వే శిక్ష వేస్తూ
ఒక్కొక్కిరినే అనుకుంటూ అందరిని దూరం చేస్తూ
ఒక సంవత్సరాన్ని పాతది చేస్తూ 
మరో సంవత్సరాన్ని కొత్తది చేస్తూ  HAPPY NEW YEAR!!

మీ ......సతీష్ ధనేకుల!!